مریض نے جان بچانے والے ڈاکٹر کی تصویرجسم پر بنوالی

 بیونس آئرس: ارجنٹینا کے ایک مریض نے کینسر سے چھٹکارے کے بعد اپنے ڈاکٹر اور محسن کا شکریہ ادا کرتے ہوئے اس کی تصویر اپنی کمر پر ٹیٹو کی صورت میں گدوالی ہے جس کی تصاویر اور ویڈیو سوشل میڈیا پر مقبول ہورہی ہیں۔

چند ماہ قبل ارجنٹینا کے ایک نوجوان نینو سیلگرو کو آنتوں میں کینسر کی تشخیص ہوئی جس سے وہ شدید پریشان ہوگیا اوراسے ڈاکٹروں کے علاقے کے اہم طبی مرک ’ز ہاسپٹل ڈی کلینیکاس‘ کی جانب بھیجا۔ یہاں کینسر اور سرجری کے ماہر پروفیسرپال لاڈا نے ان کا معائنہ کیا۔  ڈاکٹرپال اس شعبے میں 42 سال کا تجربہ رکھتے ہیں۔

انہوں نے کئی گھنٹوں کی محنت سے مریض کا کامیاب آپریشن کرکے آنت کا سرطان زدہ حصہ نکال باہر کیا ۔ اس کے بعد مریض نینو نے نہ صرف ڈاکٹر کا شکریہ ادا کیا بلکہ تشکر کے احساس کے طور پر اپنی پیٹھ پر ڈاکٹر کی تصویر ایک ٹیٹو کی صورت میں گدوالی۔

’ اس (ڈاکٹر) نے حقیقتاً میری جان بچائی ہے۔ مجھے شدید اندرونی تکلیف تھی اور اس کے بعد آنتوں کی انتہائی پیچیدہ سرجری ہوئی۔ میں بہت مشکل سے ہسپتال پہنچا تھا لیکن اپنے پیروں سے چل کر وہاں سے واپس اپنے گھر پہنچا،‘ مریض نینو سیلگرو نے بتایا۔

کینسر کے عتاب سے بچ جانے والے اس نوجوان نے کہا کہ اپنے جسم پر ڈاکٹر کا ٹیٹو بنوانے کا مقصد ایک جانب تو جان بچ جانا ہے اور دوسری جانب ڈاکٹر کی انتہائی محبت اور مہارت کی داد دینا بھی ہے۔ اس نے کہا کہ یہ ٹیٹو اس نے خود اپنے لیے بنوایا ہے جسے وہ ڈاکٹر کو دکھانا نہیں چاہتے تھے لیکن اپنی سالگرہ پر اس نے ایک تصویر ڈاکٹر کو بھجوادی جس کے بعد وہ مشہور ہوتی چلی گئی۔

دوسری جانب ڈاکٹر پال اس پر بہت حیران ہیں اور خوش بھی ہیں لیکن انہوں نے کہا کہ یہ آپریشن صرف ان کا کارنامہ نہیں بلکہ اس کے ساتھ کئی ماہرین، نرسوں اور طبی عملے نے بھی اہم کردار ادا کیا ہے۔

The post مریض نے جان بچانے والے ڈاکٹر کی تصویرجسم پر بنوالی appeared first on ایکسپریس اردو.

from ایکسپریس اردو » صحت https://ift.tt/2TNLxsj